| 摘要 |
ᠲᠤᠰ ᠦᠭᠦᠯᠡᠯ ᠳᠦ ᠴᠠᠬᠠᠷ ᠲᠦᠮᠡᠨ ᠦ ᠡᠷᠲᠡᠨ ᠦ ᠲᠡᠦᠬᠡᠨ ᠳᠡᠬᠢ ᠵᠠᠷᠢᠮ ᠠᠰᠠᠭᠤᠳᠠᠯ ᠳᠤ ᠰᠢᠨᠵᠢᠯᠡᠯ ᠬᠢᠵᠡᠢ᠃ 《ᠴᠠᠬᠠᠷ》ᠪᠤᠯ 《ᠬᠠᠭᠤᠴᠢᠨ ᠴᠠᠬᠠᠷ》᠋ ᠤᠨ ᠲᠤᠪᠴᠢᠯᠠᠯ᠃ ᠬᠠᠭᠤᠴᠢᠨ ᠴᠠᠬᠠᠷ ᠪᠤᠯ ᠴᠠᠬᠠᠷ ᠲᠦᠮᠡᠨ ᠦ ᠠᠩ᠋ᠬᠠᠨ ᠤ ᠲᠠᠪᠤᠨ ᠶᠡᠬᠡ ᠣᠲᠤᠭ ᠤᠨ ᠳᠤᠲᠤᠷᠠᠬᠢ ᠠᠬᠠᠯᠠᠭᠴᠢ ᠣᠲᠤᠭ᠂ ᠡᠨᠡ ᠣᠲᠤᠭ ᠤᠨ ᠨᠡᠷᠡ ᠡᠴᠡ ᠴᠠᠬᠠᠷ ᠭᠡᠰᠡᠨ ᠤᠯᠤᠰ ᠪᠤᠶᠤ ᠲᠦᠮᠡᠨ ᠦ ᠨᠡᠷᠡ ᠡᠭᠦᠰᠴᠡᠢ᠃ 《ᠴᠠᠬᠠᠷ》ᠭᠡᠳᠡᠭ ᠦᠭᠡ ᠫᠧᠷᠰ ᠭᠠᠷᠤᠯᠲᠠᠢ᠂ 《ᠬᠡᠦᠬᠡᠳ᠂ ᠰᠢᠳᠡᠷ》ᠬᠡᠮᠡᠬᠦ ᠤᠳᠬᠠ ᠲᠠᠢ᠃ ᠴᠠᠬᠠᠷ ᠲᠦᠮᠡᠨ ᠦ ᠡᠬᠢ ᠡᠭᠦᠰᠦᠯ ᠲᠤᠯᠤᠷ᠂ ᠰᠤᠷᠬᠠᠭᠳᠠᠨᠢ ᠶᠢᠨ ᠤᠯᠤᠰ ᠢᠷᠭᠡᠳ ᠲᠠᠢ ᠲᠡᠦᠬᠡᠨ ᠬᠤᠯᠪᠤᠭᠠ ᠲᠠᠢ᠃ 15᠋ ᠳᠤᠭᠠᠷ ᠵᠠᠭᠤᠨ ᠠᠴᠠ ᠬᠤᠪᠢᠯᠠᠢ ᠬᠠᠭᠠᠨ ᠤ ᠬᠤᠢ᠌ᠴᠢᠰ ᠭᠠᠷᠤᠯᠲᠠᠢ ᠮᠣᠩ᠋ᠭᠤᠯ ᠬᠠᠭᠠᠳ ᠤᠨ ᠬᠠᠭᠠᠨ ᠤᠷᠲᠤ ᠴᠠᠬᠠᠷ ᠲᠦᠮᠡᠨ ᠳᠦ ᠰᠠᠭᠤᠵᠤ᠂ ᠴᠠᠬᠠᠷ ᠲᠦᠮᠡᠨ ᠬᠠᠭᠠᠨ ᠤ ᠰᠢᠭᠤᠳ ᠡᠵᠡᠮᠰᠢᠯ ᠳᠦ ᠪᠠᠢ᠌ᠵᠠᠢ᠃ ᠮᠠᠨᠳᠤᠭᠤᠯ ᠬᠠᠭᠠᠨ ᠤ ᠨᠤᠶᠠᠯᠠᠯ ᠳᠤᠤᠷᠠ ᠴᠠᠬᠠᠷ ᠲᠦᠮᠡᠨ ᠬᠦᠴᠦᠷᠬᠡᠭ᠍ᠵᠢᠵᠦ᠂ ᠮᠣᠩ᠋ᠭᠤᠯ ᠬᠠᠭᠠᠳ ᠤᠨ ᠬᠠᠷᠢᠶᠠᠨ ᠳᠠᠬᠢ ᠵᠢᠷᠭᠤᠭᠠᠨ ᠲᠦᠮᠡᠨ ᠦ ᠳᠤᠲᠤᠷᠠ ᠠᠬᠠᠯᠠᠬᠤ ᠪᠠᠢ᠌ᠷᠢ ᠶᠢ ᠡᠵᠡᠯᠡᠭᠰᠡᠨ᠃ 15᠋ ᠳᠤᠭᠠᠷ ᠵᠠᠭᠤᠨ ᠤ ᠰᠡᠭᠦᠯᠴᠢ 16᠋ ᠳᠤᠭᠠᠷ ᠵᠠᠭᠤᠨ ᠤ ᠡᠬᠢᠨ ᠳᠦ ᠴᠠᠬᠠᠷ ᠲᠦᠮᠡᠨ ᠳᠦ ᠲᠠᠪᠤᠨ ᠶᠡᠬᠡ ᠣᠲᠤᠭ ᠲᠠᠢ ᠪᠠᠢ᠌ᠭᠰᠠᠨ ᠠᠴᠠ 16᠋ ᠳᠤᠭᠠᠷ ᠵᠠᠭᠤᠨ ᠤ ᠬᠤᠢ᠌ᠨᠠ ᠬᠠᠭᠠᠰ ᠪᠤᠯᠬᠤ ᠳᠤ ᠣᠯᠤᠰᠪᠤᠯᠤᠳ ᠤᠨ ᠦᠷᠡ ᠠᠴᠢᠨᠠᠷ ᠴᠠᠬᠠᠷ ᠲᠦᠮᠡᠨ ᠦ ᠳᠤᠲᠤᠭᠠᠳᠤ ᠳᠤ ᠲᠠᠰᠤᠷᠠᠯᠲᠠ ᠦᠭᠡᠢ ᠦᠮᠴᠢ ᠬᠤᠪᠢᠶᠠᠭᠰᠠᠨ ᠠᠴᠠ ᠡᠳᠦᠢ ᠲᠡᠳᠦᠢ ᠰᠢᠨᠡ ᠣᠲᠤᠭ ᠤᠳ ᠨᠡᠮᠡᠭᠳᠡᠭᠰᠡᠨ ᠪᠤᠯᠪᠠᠴᠤ ᠶᠡᠬᠡ ᠣᠲᠤᠭ ᠨᠢ ᠨᠠᠢᠮᠠᠬᠠᠨ ᠪᠠᠢ᠌ᠵᠠᠢ᠃ ᠮᠣᠩ᠋ᠭᠤᠯ ᠰᠤᠷᠪᠤᠯᠵᠢᠰ ᠲᠤ ᠴᠠᠬᠠᠷ ᠢ 《ᠨᠠᠢᠮᠠᠨ ᠣᠲᠤᠭ ᠴᠠᠬᠠᠷ》ᠬᠡᠮᠡᠳᠡᠭ ᠨᠢ ᠶᠠᠭ ᠡᠭᠦᠨ ᠢ ᠦᠨᠳᠦᠰᠦᠯᠡᠭᠰᠡᠨ᠃ ᠨᠠᠢᠮᠠᠨ ᠣᠲᠤᠭ ᠠᠨᠤ ᠠᠷᠤ ᠶᠢᠨ ᠪᠤᠶᠤ ᠪᠠᠷᠠᠭᠤᠨ ᠭᠠᠷ ᠤᠨ ᠬᠠᠭᠤᠴᠢᠳ᠂ ᠰᠦᠨᠢᠳ᠂ ᠦᠵᠦᠮᠦᠴᠢᠨ᠂ ᠬᠡᠰᠢᠭᠲᠡᠨ ᠳᠦᠷᠪᠡᠨ ᠣᠲᠤᠭ᠃ ᠦᠯᠭᠡ (ᠦᠪᠦᠷ)᠋ ᠶᠢᠨ ᠪᠤᠶᠤ ᠵᠡᠭᠦᠨ ᠭᠠᠷ ᠤᠨ ᠠᠯᠬᠠᠴᠢᠭᠤᠳ᠂ ᠠᠤᠬᠠᠨ᠂ ᠨᠠᠢᠮᠠᠨ᠂ ᠤᠷᠤᠭᠤᠳ ᠳᠦᠷᠪᠡᠨ ᠣᠲᠤᠭ᠃ |
