| Abstract |
ᠲᠤᠰ ᠦᠭᠦᠯᠡᠯ ᠳᠦ ᠵᠤᠬᠢᠶᠠᠭᠴᠢ ᠠᠴᠠ ᠡᠵᠡᠨ ᠲᠤᠪᠤ ᠰᠤᠳᠤᠯᠤᠭᠴᠢ ᠶᠢᠨ ᠦᠭᠦᠯᠡᠭᠦᠨ ᠢᠶᠡᠷ ᠲᠦᠪ ᠪᠤᠯᠭ᠋ᠠᠬᠤ ᠦᠵᠡᠯᠲᠡ ᠶᠢ ᠪᠠᠷᠢᠮᠲᠠᠯᠠᠨ᠂ ᠦᠭᠦᠯᠡᠪᠦᠷᠢ ᠳᠦ ᠬᠡᠯᠡ ᠵᠦᠢ᠂ ᠤᠳᠬᠠ ᠵᠦᠢ ᠪᠤᠯᠤᠨ ᠮᠡᠳᠡᠭᠳᠡᠯ ᠵᠦᠢ ᠶᠢᠨ ᠵᠠᠳᠠᠯᠤᠯᠲᠠ ᠬᠢ᠂ ᠦᠭᠦᠯᠡᠪᠦᠷᠢ ᠶᠢᠨ ᠦᠨᠳᠦᠰᠦᠨ ᠣᠨᠴᠠᠯᠢᠭ ᠤᠨ ᠲᠤᠬᠠᠢ (1) ᠦᠭᠦᠯᠡᠭᠦᠨ ᠨᠢ ᠦᠭᠦᠯᠡᠭᠳᠡᠭᠦᠨ ᠢᠶᠡᠨ ᠵᠠᠬᠢᠷᠤᠨᠠ᠂ (2) ᠦᠭᠦᠯᠡᠭᠦᠨ ᠨᠢ ᠭᠤᠤᠯᠯᠠᠬᠤ ᠪᠠᠢᠷᠢ ᠰᠠᠭ᠋ᠤᠷᠢ ᠡᠵᠡᠯᠡᠨᠡ᠂ (3) ᠦᠭᠦᠯᠡᠭᠳᠡᠭᠦᠨ ᠲᠤᠰᠤᠳᠭᠳᠠᠬᠤᠨ ᠬᠤᠶᠠᠷ ᠢᠵᠢᠯ ᠪᠠᠢᠷᠢ ᠰᠠᠭ᠋ᠤᠷᠢ ᠲᠠᠢ ᠭᠡᠰᠡᠨ ᠰᠠᠨ᠋ᠠᠯ ᠵᠦᠪᠯᠡᠯᠭᠡᠨ ᠳᠤᠷᠠᠳᠪᠠ᠃ ᠲᠤᠰ ᠦᠭᠦᠯᠡᠯ ᠦᠨ ᠨᠢᠭᠳᠦᠭᠡᠷ ᠬᠡᠰᠡᠭ ᠲᠦ᠂ ᠪᠦᠲᠦᠴᠡ ᠦᠵᠡᠯ ᠦᠨ ᠬᠠᠷᠢᠴᠠᠩ᠋ᠭᠤᠢ ᠰᠢᠨᠵᠢ ᠶᠢᠨ ᠵᠠᠷᠢᠮ ᠢᠶᠠᠷ ᠦᠭᠦᠯᠡᠪᠦᠷᠢ ᠪᠡ ᠬᠤᠯᠪᠤᠭᠠ ᠦᠭᠡ ᠶᠢᠨ ᠪᠦᠲᠦᠴᠡ ᠶᠢ ᠵᠠᠳᠠᠯᠤᠨ ᠰᠢᠨᠵᠢᠯᠡᠵᠦ᠂ ᠦᠭᠦᠯᠡᠭᠦᠨ ᠨᠢ ᠦᠭᠦᠯᠡᠭᠳᠡᠭᠦᠨ ᠢᠶᠡᠨ ᠵᠠᠬᠢᠷᠬᠤ ᠭᠡᠰᠡᠨ ᠦᠵᠡᠯᠲᠡ ᠪᠡᠨ ᠳᠠᠷᠠᠭ᠋ᠠᠬᠢ ᠬᠤᠶᠠᠷ ᠲᠠᠯᠠ ᠠᠴᠠ ᠲᠠᠢᠯᠪᠤᠷᠢᠯᠠᠪᠠ᠄ ᠨᠢᠭᠡ ᠳᠦ᠂ ᠦᠭᠦᠯᠡᠭᠳᠡᠭᠦᠨ ᠦᠭᠦᠯᠡᠭᠦᠨ ᠦ ᠬᠠᠷᠢᠴᠠᠭᠠ ᠪᠠ ᠦᠭᠡᠰ ᠦᠨ ᠳᠠᠷᠠᠭ᠋ᠠᠯᠠᠯ ᠤᠨ ᠣᠨᠴᠠᠯᠢᠭ ᠠᠴᠠ ᠦᠵᠡᠪᠡᠯ᠂ ᠬᠤᠯᠪᠤᠭᠠ ᠦᠭᠡ ᠶᠢᠨ ᠲᠦᠪᠰᠢᠨ ᠳᠦ ᠳᠠᠭ᠋ᠠᠭ᠋ᠤᠯᠢ ᠦᠭᠡ ᠨᠢ ᠭᠤᠤᠯᠯᠠᠬᠤ ᠦᠭᠡᠨ ᠳᠡᠭᠡᠨ ᠵᠠᠬᠢᠷᠤᠭᠳᠠᠬᠤ ᠦᠨᠳᠦᠰᠦᠨ ᠳᠦᠷᠢᠮ ᠦᠨ ᠶᠤᠰᠤᠭ᠋ᠠᠷ᠂ ᠦᠭᠦᠯᠡᠭᠳᠡᠭᠦᠢ ᠨᠢ ᠦᠭᠦᠯᠡᠭᠦᠢ ᠳᠡᠭᠡᠨ ᠵᠠᠬᠢᠷᠤᠭᠳᠠᠨᠠ ᠭᠡᠵᠡᠢ᠃ ᠬᠤᠶᠠᠷ ᠲᠤ᠂ ᠦᠭᠦᠯᠡᠭᠳᠡᠭᠦᠨ ᠦᠭᠦᠯᠡᠭᠦᠨ ᠦ ᠬᠠᠷᠢᠴᠠᠭᠠ ᠪᠠ ᠲᠡᠢᠨ ᠢᠯᠭ᠋ᠠᠯ ᠤᠨ ᠣᠨᠴᠠᠯᠢᠭ ᠠᠴᠠ ᠦᠵᠡᠪᠡᠯ᠂ ᠦᠭᠦᠯᠡᠪᠦᠷᠢ ᠶᠢᠨ ᠲᠦᠪᠰᠢᠨ ᠳᠦ ᠦᠭᠦᠯᠡᠭᠳᠡᠭᠦᠨ ᠨᠢ ᠬᠤᠤᠰᠮᠠᠭ ᠰᠢᠨᠵᠢᠲᠡᠢ ᠪᠦᠭᠡᠳ ᠶᠠᠮᠠᠷ ᠲᠡᠢᠨ ᠢᠯᠭ᠋ᠠᠯ ᠢᠶᠠᠷ ᠪᠠᠢᠳᠠᠭ ᠢ ᠦᠭᠦᠯᠡᠭᠦᠨ ᠦ ᠦᠭᠡᠰ ᠦᠨ ᠰᠠᠩ — ᠬᠡᠯᠡ ᠵᠦᠢ ᠶᠢᠨ ᠰᠢᠨᠵᠢ ᠴᠢᠨ᠋ᠠᠷ ᠣᠨᠴᠠᠯᠢᠭ ᠪᠠ ᠢᠯᠭ᠋ᠠᠨ ᠲᠤᠭᠲᠠᠭ᠋ᠠᠬᠤ ᠬᠡᠮᠨ᠋ᠡᠭᠦᠷ ᠰᠢᠢᠳᠪᠦᠷᠢᠯᠡᠨᠡ ᠭᠡᠪᠡ᠃ ᠬᠤᠶᠠᠳᠤᠭ᠋ᠠᠷ ᠬᠡᠰᠡᠭ ᠲᠦ᠂ ᠦᠭᠦᠯᠡᠭᠦᠨ ᠨᠢ ᠦᠭᠦᠯᠡᠭᠳᠡᠭᠦᠨ ᠢᠶᠡᠨ ᠵᠠᠬᠢᠷᠬᠤ ᠦᠵᠡᠯᠲᠡ ᠪᠡᠷ ᠬᠡᠯᠡᠪᠡᠯ᠂ ᠦᠭᠦᠯᠡᠭᠳᠡᠭᠦᠨ ᠦ ᠬᠡᠯᠡ ᠵᠦᠢ ᠶᠢᠨ ᠪᠠᠢᠷᠢ ᠰᠠᠭ᠋ᠤᠷᠢ ᠨᠢ ᠦᠭᠦᠯᠡᠭᠦᠨ ᠡᠴᠡ ᠳᠤᠤᠷᠠ ᠪᠠᠢᠳᠠᠭ᠂ ᠲᠡᠭᠦᠨ ᠢ ᠵᠠᠬᠢᠷᠤᠭᠳᠠᠬᠤ ᠪᠦᠷᠢᠯᠳᠦᠵᠭᠦᠨ ᠦ ᠪᠠᠷᠢᠨ ᠳᠤ ᠣᠷᠤᠭ᠋ᠤᠯᠵᠤ ᠳᠤᠰᠤᠭᠳᠠᠬᠤᠨ ᠲᠠᠢ ᠢᠵᠢᠯ ᠲᠦᠷᠦᠯ ᠦᠨ ᠶᠠᠭ᠋ᠤᠮᠠ ᠪᠠᠷ ᠦᠵᠡᠵᠦ ᠪᠤᠯᠬᠤ ᠶᠤᠮ ᠭᠡᠵᠡᠢ᠃ ᠡᠭᠦᠨ ᠡᠴᠡ ᠦᠨᠳᠦᠰᠦᠯᠡᠨ᠂ ᠦᠭᠦᠯᠡᠭᠦᠨ ᠦ ᠭᠤᠤᠯᠯᠠᠬᠤ ᠪᠠᠢᠷ ᠰᠠᠭ᠋ᠤᠷᠢ ᠪᠠ ᠦᠭᠦᠯᠡᠭᠳᠡᠭᠦᠨ ᠳᠤᠰᠤᠭᠳᠠᠬᠨᠤᠨ ᠤ ᠢᠵᠢᠯ ᠪᠠᠷᠢ ᠰᠠᠭ᠋ᠤᠷᠢ ᠶᠢᠨ ᠲᠤᠬᠠᠢ ᠵᠠᠳᠠᠯᠤᠨ ᠰᠢᠨᠵᠢᠯᠡᠵᠦ᠂ ᠦᠭᠦᠯᠡᠪᠦᠷᠢ ᠶᠢᠨ ᠳᠤᠲᠤᠷᠠ ᠬᠡᠯᠡ ᠵᠦᠢ ᠶᠢᠨ ᠪᠡ ᠤᠳᠬᠠ ᠵᠦᠢ ᠶᠢᠨ ᠠᠯᠢ ᠲᠠᠯᠠ ᠪᠠᠷ ᠬᠡᠯᠡᠭᠰᠡᠨ ᠴᠦ ᠭᠠᠭᠴᠠ ᠭᠦ ᠦᠭᠦᠯᠡᠭᠦᠨ ᠨᠢ ᠲᠦᠪ ᠪᠤᠯᠬᠤ ᠭᠡᠰᠡᠨ ᠳ᠋ᠦᠩᠨ᠋ᠡᠯᠲᠡ ᠬᠢᠵᠡᠢ᠃ |